Tíðindi

Landsfelag Pensjónista hevur fingið nýggja teldupostadressu, ið er: lp@eldri.fo

1 mánaður síðani

Landsfelag Pensjónista

Beate L. Samuelsen, forkvinna, helt røðu 1. mai 2020 á arbeiðaradegnum

Góðu áhoyrarar

Sum forkvinna í Landsfelag Pensjónista, vil eg takka Havnar Arbeiðarafelag fyri at hava heitt á meg at halda røðu á hesum týdningarmikla arbeiðaradegi 1.mai. Ein dagur, sum á hvørjum ári verður hildin yvir mesta partin av heiminum.

Í fyrstu syftu hugsa fleiri: Hvat hava Havnar Arbeiðarafelag, ja arbeiðarafeløg yvirhøvur, og Landsfelag Pensjónista til felags? Arbeiðarafeløg eru fakfeløg fyri arbeiðsmenn og -kvinnur, meðan eitt pensjónistafelag ikki er nakað fakfelag, men eitt felag fyri pensjónistar og gomul fólk.

Í stuttum kann upplýsast, at Landsfelag Pensjónista er áhugafelag fyri allar pensjónistar úr øllum landinum. Eitt felag fyri fólk, sum eru farin av arbeiðsmarknaðinum, summi nýliga og onnur fyri nógvum árum síðani. Hetta er eisini eitt felag fyri pensjónistar, sum framvegis arbeiða í besta ”velgående”. Landsfelag Pensjónista er sostatt eisini eitt felag fyri arbeiðsmenn og kvinnur, sum rokkið hava pensjónsaldur.

Fakfeløg og LP Uppgávan hjá Landsfelag Pensjónista er at arbeiða fyri øllum áhugamálum hjá pensjónistum. Hetta er eitt ópolitiskt felag, sum ráðgevur landsstýri, løgtingi og kommunum, tá ið um eldrapolitikk ræður.

Tað, sum vit hava til felags við Havnar Arbeiðarafelag og onnur fakfeløg, er, at størsti partur av teimum, sum í dag eru pensjónistar, eru gamlir limir í fakfeløgunum. Tí ynskja vit í Landsfelagnum at hava eitt tættari samstarv við fakfeløgini, soleiðis at tit eru við at mynda framtíðina hjá tykkara limum, ið
verða pensjónistar fyrr ella seinni.

Nevnast kann, at millum 67 og 74 ára gomlu pensjónistarnar eru 64 % ella nærum 2/3 framvegis virknir á arbeiðsmarknaðinum og geva sítt íkast til landsins búskap. Føroyskir pensjónistar eru teir í Norðanlondum, har flestir eru á arbeiðsmarknaðinum.

Í fyrsta hjálparpakkanum, sum landsstýrið kom við í samb. við Korona-kreppuna, vóru pensjónistar á privata arbeiðsmarknaðinum gloymdir. Hetta vóru teir, sum í mars í ár vóru sendir til hús uttan løn.

Korona-innrásin Arbeiðsfólk upp til 67 ára aldur komu við í hjálparpakka 1 og harvið í Als-skipanina vegna Korona, men ikki tey omanfyri 67. Hetta var heldur løgi, eftir sum fleiri politiskir flokkar undan løgtingsvalinum í fjør dúvaðu uppá, hvussu neyðugt tað var, at fólk, sum høvdu hug og orku at arbeiða eftir at hava rundað tey 67, framvegis skuldu hava møguleikan at vera á arbeiðsmarknaðinum, um tey høvdu hug til tað, tí landið hevði brúk fyri hesi arbeiðsmegi.

Haraftrat kemur tað væl við at vinna sær nøkur oyru afturat fólkapensjónini og Samhaldsfasta, sum annars ikki er nakað at rópa hurrá fyri, sammett við fólkapensjónir í grannalondum okkara.

Landsfelag Pensjónista fegnast í øllum førum um, at í hjálparpakka 2 hjá landsstýrinum eru pensjónistarnir tiknir við og fáa teir løn til 30. juni eins og øll onnur í somu støðu.

Ein lívsdygd Undan seinasta løgtingsvali tyktist, sum teir tríggir flokkarnir, sum í dag manna landsstýrið, tóku undir við ynskjunum hjá Landsfelag Pensjónista at hækka galdandi frádráttarfría inntøkumarkið úr kr. 60.000 upp til kr. 100.000 fyri á tann hátt at eggja pensjónistum at arbeiða. Í Danmark er hendan upphæddin kr. 122.000. Men gakk. Tá samanum kom, var frádráttarfría inntøkuupphæddin ikki hækkað, men lækkað úr kr. 60.000 niður í kr. 45.000. Tað jaliga í øllum hesum er tó, at sum pensjónistur kann tað framvegis kann loysa seg at arbeiða. Fyri stakar pensjónistar fellir viðbótin nevniliga ikki burtur, fyrr enn tú hevur eina inntøku omanfyri kr. 250.000, hetta tí mótrokningin í viðbótini minkaði úr 60 % til 20 %.

At arbeiða er ein lívsdygd, ein lívskvalitetur. Nógvir pensjónistar eru glaðir fyri sítt arbeiði og kunnu saktans halda fram í fleiri ár aftaná 67 ára aldur. Tað vísa tølini, sum eg nevndi fyri løtu síðani. Fyri nógvar pensjónistar er tað lívsneyðugt at hava møguleikan at fara til arbeiðis hvønn dag. Um ikki, teir hava okkurt at fara upp til, fella teir í fátt. Summir liva fyri sítt arbeiði.

Eitt spark í afturpartin Tíverri er støðan tann, at tú í føðingardagsgávu frá arbeiðsgevara tínum kanst vænta tær eitt spark í afturpartin, tá tú fyllir 67. Um ikki tú hevur ein góðan arbeiðsgevara, eitt gott arbeiðspláss við góðum eldrapolitikki, verður tú trýstur heim á sofuna at liggja. Har kanst tú so liggja og søkka niður í eina djúpa depressión.

Hví skal eitt tal, ein føðingardagur, ein dato, gera av, at nú er well? Ver við hús. Portrið út í arbeiðslívið er stongt, ikki vegna Korona, men vegna aldur. Hetta er veruleikin. Eingin takkar tær fyri tín áralanga innsats til landsins búskap. Mong dømir eru um slíkar syrgiligar lagnur.

Tey eru eisini mong, sum hava fyrireikað seg væl og virðiliga til
pensjónsaldurin. Tey gleða seg til endiliga at fáa stundir at gera tað, tey hava hug til. Tey gleða seg til at sleppa frá at fara til arbeiðis og at verða bundin av eini klokku, sum hvønn morgun í ein mansaldur hevur vakt ikki bara hendan eina persónin, men alt húskið, við einum ringjandi og gellandi vekjaraljóði. Ikki bara foreldur, ommur og abbar, eru pensjónistar. Skjótt eru tað eisini tit, sum eru yngri.

Eingin olmussa 16 pensjónistafeløg og eldrafeløg, ið tilsamans umboða okkurt um 1600 pensjónistar um alt landið, eru limir í Landsfelag Pensjónista.

Viðhvørt kunnu vit fáa kensluna av, at eingin lurtar eftir okkum, og at vit pensjónistar bara eru 2. floks borgarar. Vit skulu tiga, halda munn og takka fyri, at vit yvirhøvur fáa nakra pensjón. Sum um tað er ein gáva. Ein gáva er pensjónin ikki. Vit hava sjálvi goldið hana umvegis skattin alt okkara arbeiðslív.

Føroyar blivu so ikki júst tað paradísið, sum okkum var lovað undan løgtingsvalinum í 2019, men tó eitt fet rætta vegin. Um stígur kemur í hesa røttu leið, vita vit av góðum orsøkum ikki, eftirsum Korona hevur gjørt innrás um allan heimin.

Tá Landsfelag Pensjónista fær fundarboð frá landsins myndugleikum í sambandi við mál, ið hava við okkum eldru at gera, og vit samstundis síggja, at nógv av tí, vit hava uppá hjarta, verður tikið við í endaligu avgerðini, ja, so fegnast og gleðast vit. Í Føroyum eru í dag 8060 pensjónistar. Tað er ikki einki og talið veksur hvønn dag. Vit hava tað eisini heilsuliga munandi betri í dag enn undanfarnu ættarlið.

Verkætlan av bakkastokki

Vit kunnu aldursluta pensjónistar upp í tvey. Teir yngru pensjónistarnir, sum eru 67 ár og upp til 75, og so teir, ið eru eldri. Sum landsfelag fyri allar pensjónistar kundu vit hugsa okkum at vita, hvussu pensjónistar í aldrinum 75+ hava tað. Síðani í heyst hevur Landsfelag Pensjónista í tøttum samstarvi við Depilin fyri Heilsu- og Almannagransking og Gallup Føroyar arbeitt við eini verkætlan, sum fer av bakkastokki heilt skjótt. Til verkætlanina hava vit fingið góðar kr. 308.000 úr Sjúkrakassagrunninum. Tað eru vit ómetaliga takksom fyri.

Úrslitið, sum vónandi fyriliggur einaferð í heyst, skal nýtast innan gransking í samb. við eldrapolitikk, og sum grundarlag undir ætlanum, ið lands- og kommunalpolitikkarar kunnu brúka, so teir eru betri ílætnir, tá t.d. tilboð til eldri skulu veitast og røktar-, og ellisheim skulu byggjast.

At vit hava brúk fyri ymiskum innan eldraøkið, vita vit øll, og ikki minst tit, sum hvørjum ári savnast um internationala arbeiðaradagin 1. mai.

Takk fyri og góðan arbeiðaradag.

Beate L. Samuelsen, forkvinna Landsfelag Pensjónista 1. mai 2020
... Sjá MeiraSjá Minni

Sjá á Facebook

1 mánaður síðani

Landsfelag Pensjónista

Landsfelag Pensjónista hevur fingið nýggja teldupostadressu, ið er:
lp@eldri.fo
... Sjá MeiraSjá Minni

Sjá á Facebook

2 mánaði síðani

Landsfelag Pensjónista
Sjá á Facebook

5 mánaði síðani

Landsfelag Pensjónista

Landsfelag Pensjónista ynskir øllum eini gleðilig jól 🎄og eitt eydnuríkt nýggjár 🎉😊 ... Sjá MeiraSjá Minni

Sjá á Facebook

6 mánaði síðani

Landsfelag Pensjónista

Landsfelag Pensjónista hevur í dag verið á fundi hjá Løgtingsins Trivnaðarnevnd í samband við niðanfyrinevndu lógaruppskot, har Landsfelag Pensjónista hevur sent soljóðandi HOYRINGSSVAR:

Almannamálaráðið hevur við telduposti tann 4. nov. 2019 sent Landsfelag Pensjónista hesi lógaruppskot til hoyringar:

1. Løgtingsmál nr. 10/2019: Uppskot til løgtingslóg um broyting í løgtingslóg um almannapensjónir o.a. (lækking av mótrokning)
2. Løgtingsmál nr. 11/2019: Uppskot til løgtingslóg um broyting í løgtingslóg um áseting og javning av almannaveitingum (Hækking av grundupphædd og lækking av frádráttarfríari inntøkuupphædd)
3. Løgtingsmál nr. 20/2019: Uppskot til løgtingslóg um broyting í løgtingslóg um áseting av skatti (Ásetingarlógin) (Skattafrádráttur á kr. 6.000 um árið til fólkapensjónistar)

Landsstýrið sigur, at endamálið við uppskotunum er at betra fíggjarligu viðurskiftini hjá fólkapensjónistum og at gera treytirnar lagaligari hjá teimum fólkapensjónistum, sum hava inntøkur afturat pensjónini.
Eftir at hava viðgjørt lógarpakkan, eru ávísar betringar, tó eru vit vónbrotin, tá tað kemur til at eggja pensjónistum at arbeiða.

Viðmerkingar til løgtingsmál nr. 10/2019:
Landsfelag Pensjónista tekur undir við lógaruppskotinum at mótrokningarprosentið lækkar frá 60% niður í 20%.
Landsfelag Pensjónista er framvegis ímóti, at grundupphæddin verður lækkað hjá persónum, ið eru føddir eftir 31. des. 1952, tvs. at grundupphæddin skal ikki mótroknast.

Viðmerkingar til løgtingsmál nr. 11/2019:
Landsfelag Pensjónista tekur ikki undir við, at frádráttarfría inntøkuupphæddin verður lækkað úr ávikavist 61.900 kr. og 60.000 kr. til 40.000 kr. Lækkingin førir við sær, at áhugin hjá pensjónistum at arbeiða minkar, og rakar hetta serstakliga pensjónistar, ið forvinna sær eina lítla inntøku afturat pensjónini.
Hetta er beint ímóti ynskjunum hjá Landsfelag Pensjónista, sum vit gjørdu vart við undan løgtingsvalinum, at hækka frádráttarfríu inntøkuupphæddina upp á í minsta lagi 100.000 kr., fyri at tað skal loysa seg hjá pensjónistum at arbeiða. Hetta tóku bæði Fólkaflokkurin, Sambandsflokkurin og Miðflokkurin undir við.
Í hesum sambandi kunnu vit vísa á, at í Danmark varð inntøkumarkið hækkað úr 30.000 kr. upp í 100.000 kr. á nýggjárinum í 2019 og er longu aftur hækkað upp í 122.000 kr., galdandi afturvirkandi frá 1. jan. 2019. Hetta tí samfelagið hevur brúk fyri, at pensjónistar eru á arbeiðmarknaðinum. At landsstýrið ger tað beint mótsatta, er óskiljandi fyri okkum, tí í Føroyum er eisini brúk fyri arbeiðsmegi.
Nevnast kann, at Landskassin og kommunurnar fáa skattainntøkur, tá pensjónistar eru á arbeiðsmarknaðinum.

Tað er hugstoytandi at síggja á síðu 8, talva 5 og 6, at tey, ið hava eina inntøku millum 50.000 -100.000 kr. hava minst fyrimun av hesi lógarbroyting, meðan teir pensjónistar, ið hava eina inntøku frá 150.000-450.000 kr. hava størstan fyrimun, har hækkingin í inntøkuni er upp til meira enn tvífalt.
Hendan skeiva sosiala hækkingin eigur heldur at verða latin til teir pensjónistar, ið eru í fátækraváða. Vit hava í dag 2.500 pensjónistar, ið eru í fátækraváða og eiga at lyftast upp.

Viðmerkingar til løgtingsmál nr. 20/2019:
Landsfelag Pensjónista tekur undir við lógaruppskotinum og fegnast um, at pensjónistarnir fáa ein skattafrádrátt uppá 3.000 kr. í 2020 og síðan 6.000 kr. um árið frá 2021.

Tað er ógreitt, nær gildiskoman er fyri lógarpakkan, og mælir Landsfelag Pensjónista til at gildiskoman verður 1. januar 2020 fyri øll trý lógaruppskotini.

Vegna
Landsfelag Pensjónista
Beate L. Samuelsen, forkvinna
... Sjá MeiraSjá Minni

Sjá á Facebook

9 mánaði síðani

Landsfelag Pensjónista

Tað var ein sera áhugaverdur fyrilestur, ið Jon-Roar Bjørkvold hevði í Norðurlandahúsinum 7. sept. um tað musiska menniskja. Vit lærdu nógv nýtt, sum vit kunnu brúka bæði til okkum sjálvi og saman við øðrum. ... Sjá MeiraSjá Minni

Sjá á Facebook

9 mánaði síðani

Landsfelag Pensjónista

Landsfelag Pensjónista skipar saman við Norðurlandahúsinum fyri einum áhugaverdum fyrilestri " Tað musiska menniskja" við Jon-Roar Bjørkvold. Hann er ein lívligur fyrilestrarhaldari og hevur gott samband við áskoðarnar. Fyrilesturin verður í Norðurlandahúsinum ley. 7. sept. kl. 13-15. sí meira á www.nlh.fo ella www.eldri.fo. ... Sjá MeiraSjá Minni

Sjá á Facebook

10 mánaði síðani

Landsfelag Pensjónista

Seinasta freist at melda til Eldradagin í SALT er 15. aug.
Melda til við at flyta 350 kr. á konto 9181-363.778.8
... Sjá MeiraSjá Minni

Sjá á Facebook

10 mánaði síðani

Landsfelag Pensjónista

Skráin til Eldradagin 24. aug. 2019 í SALT sæst her: eldri.fo/wp-content/uploads/2019/06/Skrá-fyri-Eldradagin-2019-í-Suðuroy.pdf ... Sjá MeiraSjá Minni

Sjá á Facebook